Agustín Fernández Paz premia á cultura galega

Desde que me enterei da noticia no blogue da Profa,  lévolle dando voltas a como escribir algo louvando o xesto de Agustín Fernández Paz de rexeitar o Premio da Cultura  que lle acaban de conceder e non dou atopado as suficientes palabras de agradecemento por este premio que Agustín lle acaba de conceder á nosa cultura. Non sei se algún día os galegos seremos quen de lle recompensar como o merece todo o que leva feito pola cultura e o orgullo propios.
As razóns da decisión do escritor estaban redactadas no chamamento de ProLingua do pasado 8 de outubro. En coherencia con esta toma de postura Agustín Fernández Paz redacta un comunicado  comunicado , no que comenta sobre o premio concedido que:

Aínda que o singularizasen na miña persoa, estou convencido de que pensaban en todo o colectivo que, desde hai ben anos, vén esforzándose en crear en Galicia unha literatura infantil e xuvenil de alta calidade.

Se realmente o premio está dirixido a todos os creadores (de literatura infantil e xuvenil ou do que sexa), un non pode deixar de preguntarse cantos deles terán a coherencia e a valentía de  facer o que el fixo. Verémolo nos vindeiros días.
De corazón, grazas, Agustín.